Átta vilja smíða nýjan Bjarna Sæmundsson
Setja bókamerki
Átta skipasmíðastöðvar hafa lýst áhuga á að taka þátt í útboði vegna smíði á nýju rannsóknaskipi sem mun leysa Bjarna Sæmundsson, sem nú er orðinn 51 árs, af hólmi. Þetta er niðurstaða forútboðs sem Ríkiskaup opnaði 5. maí og gerði Kristján Þór Júlíusson, sjávarútvegs- og landbúnaðarráðherra, grein fyrir málinu á fundi ríkisstjórnarinnar í morgun, að því er fram kemur í tilkynningu á vef stjórnarráðsins.
Þar segir að gert sé ráð fyrir að samið verði um smíði skipsins fyrir 1. nóvember og að smíði geti hafist í kjölfarið, en smíðatíminn er áætlaður tvö ár og kemur skipið líklegast til landsins á síðari hluta 2023.
„Gert er ráð fyrir svokölluðu samkeppnisútboði sem gefur möguleika á viðræðum við boðendur og aðlögun vegna tilboða. Samhliða því að unnið er að hæfnismati á skipasmíðastöðvunum. Þegar þeirri vinnu verður lokið mun útboð um smíði skipsins fara fram og þær stöðvar sem standast hæfnismat fá að taka þátt í því útboði,“ segir í tilkynningunni.
Útboðsferlið hefst fyrsta júní með útsendingu gagna og verður opnað fyrir útboð um tveimur mánuðum síðar. Þá er áætlað að það taki um tvo til þrjá mánuði að vinna úr þeim tilboðum sem berast í verkið. Að því loknu verður gengið til samninga um smíði skipsins.
„Við hönnun á nýju rannsóknaskipi fyrir Hafrannsóknastofnun hefur verið horft til ýmissa leiða til að draga úr notkun jarðefnaeldsneytis. Hægt verður að brenna lífdísil (t.d. repjuolíu) og er þeim möguleika haldið opnum í hönnun að gera ráð fyrir plássi fyrir búnaði sem þarf til ef hentugar vélar til brennslu metanóls verði komnar í framleiðslu á smíðatímanum. Innan skips verður leitað allra leiða til að spara orku. Til lýsingar er notuð LED tækni, spilbúnaður skipsins verður rafdrifinn, til upphitunar verður notuð afgangsorka frá kælivatni aðalvéla og vistarverum skipt upp þannig að einungis verði loftræstar þær sem eru í notkun hverju sinni. Skipið verður við landrafmagn og gert er ráð fyrir að settir verði upp varmaskiptar í heimahöfn skipsins þannig að skipið verði hitað upp með vatni frá hitaveitu,“ segir í tilkynningunni á vef stjórnarráðsins.
Myndskeið: Hátt í 140 lömb á tveimur sólarhringum
Kostnaðurinn nemur allt að þremur milljörðum
Halla: Líkti Ólafi Ragnari ekki við Robert Mugabe
Fann bein og tönn úr dýrum í sprungunni
Um 70 jarðskjálftar í kvikuganginum
Rannsaka drómasýki í hestum
Mennirnir í haldi lögreglunnar á Suðurnesjum
Vantar fólk: „Þetta er gaman en það er ekki nóg“