Íslands- og bikarmeistarar Víkings Reykjavíkur unnu 6-1 stórsigur á Levadia Tallin í undanúrslitum forkeppni fyrir undankeppni Meistaradeildar Evrópu í gær. Eistneski fjölmiðillinn Õhtuleht segir úrslitin skammarleg fyrir Levadia.
Levadia komst yfir í gær með marki Zakaria Beglarishvili af vítapunktinum á 5. mínútu. Eftir það tóku Íslandsmeistararnir hins vegar yfir leikinn. Kyle McLagan jafnaði á 10. mínútu og á 27. mínútu var Kristall Máni Ingason búinn að koma Víkingum yfir. Halldór Smári Sigurðsson skoraði svo þriðja markið seint í fyrri hálfleik.
Í þeim síðari bættu þeir Nikolaj Hansen, Helgi Guðjónsson og Júlíus Magnússon svo við mörkum.
„Skammarlegt,“ segir í byrjun fyrirsagnar Õhtuleht. „Það var fallegt að sjá stöðuna á skiltinu (eftir að Levadia komst yfir) en okkar menn áttu erfitt með að spila sín á milli og jöfnunarmark lá í loftinu,“ segir einnig í umfjöllun miðilsins. Forysta liðins lifði aðeins í fimm mínútur. „Það var rok og rigning og lókallinn var glaður,“ stóð einnig í miðlinum.
Víkingur mætir Inter Club d’Escaldes í úrslitaleik um laust sæti í undankeppni Meistaradeildarinnar á föstudag.