Malmö 3 – 2 Víkingur R.
1-0 Martin Olsson (’16)
1-1 Kristall Máni Ingason (’38)
2-1 Ola Toivonen (’42)
3-1 Veljko Birmancevic (’84)
3-2 Helgi Guðjónsson
Rautt spjald: Kristall Máni Ingason, Víkingur R. (’39)
Víkingur Reykjavík hóf leik í undankeppni Meistaradeildar Evrópu í kvöld er liðið spilaði við Malmö frá Svíþjóð ytra.
Um var að ræða fyrri leik liðanna af tveimur en Malmö kemur svo til Íslands í heimsókn þann 12. júní næstkomandi.
Það varð allt vitlaust í þessum fyrri leik liðanna í kvöld og þá sérstaklega í fyrri hálfleik eins og mikið hefur verið fjallað um.
Malmö tók forystuna á 16. mínútu fyrri hálfleiks er Martin Olsson kom boltanum í netið.
Kristall Máni Ingason átti mjög góðan hálfleik fyrir Víkinga og tókst að jafna metin fyrir Víkinga á 38. mínútu en hann var þá á gulu spjaldi.
Kristall fékk að líta sitt annað gula spjald eftir að hafa skorað markið fyrir að ‘sussa’ á áhorfendur sem var alveg galin dómgæsla frá dómara kvöldsins.
Dómarinn virtist aldrei vera með tök á þessum leik en samtals fóru sjö gul spjöld á loft í fyrri hálfleik ef tekið er spjöld Kristals með.
Malmö nýtti sér liðsmuninn stuttu eftir rauða spjald Kristals er Ola Toivonen kom boltanum í netið með skalla eftir fyrirgjöf.
Malmö var eins og gefur að skilja betri aðilinn í seinni hálfleik og tókst að bæta við marki á 84. mínútu og útlitið ekki of gott.
Helgi Guðjónsson elskar að skora mörk og náði hann að minnka muninn fyrir Víkinga á 94. mínútu með marki sem gæti skipt gríðarlega miklu máli.
Milos Milojevic er þjálfari Malmö en hann var áður hjá bæði Víking og Breiðablik hér heima.