55 ára gamall Hafnfirðingur verður næstkomandi mánudag gert að svara fyrir meint ofbeldisverk en hann er ákærður fyrir að hafa föstudagskvöldið 25. september í fyrra ráðist að lögreglu og fangavörðum.
Er manninum í ákæru héraðssaksóknara gert að sök að hafa ráðist að lögreglumönnum fyrir utan skemmtistaðinn Ölhúsið við Reykjavíkurveg í Hafnarfirði með spörkum. Fyrst er hann sagður hafa sparkað í vinstri fótlegg eins lögreglumanns svo að hann hlaut yfirborðsáverka á hné, og svo ýtt við öðrum lögreglumanni þannig að hann missti jafnvægið.
Nokkru síðar, að því er segir í ákærunni, er maðurinn sagður hafa ráðist að fangaverði við Hverfisgötu 113-115, þar sem stöð lögreglunnar á Höfuðborgarsvæðinu er til húsa, með því að sparka tvisvar í fætur hans.
Brotin er í ákærunni sögð varða við lög um brot gegn valdstjórninni og krefst saksóknari þess að hann verði dæmdur til refsingar og að hann greiði allan sakarkostnað.
Málið er rekið fyrir Héraðsdómi Reykjaness.