Afar sérstæð Facebook-síða nefnd í höfuð tónlistarkonunnar Bjarkar Guðmundsdóttur var opnuð á Facebook í dag. Allur texti síðunnar er á stirðri og vélþýddri íslensku. Myndir af Björk eru á síðunni og spiluð myndbönd þar sem hún segir frá tónlist sinni.
Um 20 manns eru að fylgjast með síðunni þegar þetta er skrifað. Fólki er lofað nokkuð háum peningaupphæðum fyrir að taka þátt í leik sem virðist snúast um að skrifa bókstaf í ummælakerfi undir færslu. Þegar DV freistaði þess að senda fyrirspurn á síðuhaldara var honum svarað með yfirlýsingu um að viðkomandi hefði unnið 50 þúsund krónur í reiðufé. Til að fá vinninginn þyrfti að deila færslunni með 5-10 hópum á Facebook og gera einhverjar aðrar deilinga- og þátttökukúnstir.
DV bar síðuna undir lögregluna á höfuðborgarsvæðinu sem kannast ekki við hana, en svaraði: „Það er full ástæða fyrir fólk að vara sig á netinu, margt er um svindlið.“