Erlendir ríkisborgarar frá ákveðnum löndum utan EES munu geta dvalið á Íslandi í allt að sex mánuði og stundað vinnu sína hjá erlendum fyrirtækjum í fjarvinnu, samkvæmt breytingum á reglugerðum sem ráðherrar í ríkisstjórninni undirrituðu í dag.
Stefnan er að skoða framkvæmdina áfram, svo hægt verði að bjóða upp á dvöl til enn lengri tíma. Íslandsstofa mun sjá um upplýsingagjöf og kynningarstarf aðgerðarinnar.
Með breytingunum verður þeim ríkisborgurum, sem eru undanþegnir áritunarskyldu, heimilt að sækja um langtímavegabréfsáritun á Íslandi fyrir starfsmenn í fjarvinnu og fjölskyldur þeirra án þess að þurfa að flytja lögheimili til landsins eða fá kennitölur.
Þórdís Kolbrún R. Gylfadóttur nýsköpunarráðherra hefur haft frumkvæði að þessu verkefni og ráðuneyti hennar unnið að því í samvinnu við dómsmálaráðuneytið, fjármála- og efnahagsráðuneytið og Skattinn og fleiri að útfæra heimild fyrir einstaklinga sem eru í föstu ráðningarsambandi við erlend fyrirtæki að dvelja og starfa hér á landi í sex mánuði, en í kjölfar COVID-19 faraldursins hafa fjöldamörg fyrirtæki opnað á fjarvinnu. Fram til þessa hefur aðeins verið hægt að dvelja hér á landi í 90 daga við slíkar aðstæður.
„Til að fá heimild fyrir lengri dvöl þarf viðkomandi að sýna fram á ráðningarsamband, tekjur og sjúkratryggingar. Áfram verður unnið að því að skoða framkvæmdina til að hægt verði að bjóða upp á dvöl til enn lengri tíma. Samstarf og samráð mun hefjast sem fyrst um það hvernig skattamál og dvalarheimildir yrðu útfærðar. Það mun kalla á víðtækt samstarf,“ segir í tilkynningu um þessa aðgerð á vef stjórnarráðsins.
„Til að byggja upp útflutningsgreinar byggðar á hugviti þurfum við að búa til umhverfi, suðupott fólks með hugmyndir og hæfni sem kynnist, lærir af hvert öðru, og býr til tækifæri framtíðarinnar. Með því að opna nú fyrir og auðvelda starfsfólki að vinna frá Íslandi, bætum við þekkingu og tengingum inn í íslenska umhverfið,“ er haft eftir Þórdísi Kolbrúnu í tilkynningu um málið.
„Við höfum sérstöðu hvað varðar landlegu, tengjum tímabelti austur og vestur Evrópu við austur- og mið Bandaríkin. Við höfum upp á mikið að bjóða fyrir erlenda sérfræðinga og getum lært mikið af þeim. Einn helsti veikleiki íslenska nýsköpunarumhverfisins eru tengingar okkar við útlönd. Með því að hvetja fjarvinnufólk til að koma til Íslands erum við að minnka heiminn og búa til mikilvægar tengingar sem annars væri erfitt að koma á. Nú höfum við stigið þetta mikilvæga skref en ætlum að halda áfram vinnu við að stíga enn stærri skref svo við getum boðið upp á enn lengri dvöl íslensku samfélagi til hagsbóta,“ er enn fremur haft eftir ráðherranum.
Tryggja á að ekkert á skattahliðinni stoppi þetta
Á vef stjórnarráðsins kemur fram að breytingin sem gerð sé í dag kalli ekki á lagabreytingar, heldur hafi Áslaug Arna Sigurbjörnsdóttir dómsmálaráðherra og Bjarni Benediktsson fjármála- og efnahagsráðherra undirritað breytingar á reglugerðum um útlendinga og reglugerðum um tekjuskatt og fasta starfstöð.
„Við ætlum að tryggja að út frá skattahliðinni sé ekkert sem kemur í veg fyrir að hægt verði að nýta þann möguleika að fá hingað tímabundið til starfa einstaklinga sem starfa hjá erlendum fyrirtækjum, en þessir sérfræðingar búa yfir verðmætri hæfni og þekkingu. Í þessu felast ótal tækifæri og í viðspyrnunni við kórónuveirufaraldrinum er mikilvægt að horfa til þess hvernig við getum styrkt efnahagslega stöðu okkar með fjölbreyttum hætti, meðal annars með nýjum tengslum og þekkingu á vettvangi nýsköpunar og rannsókna,” er haft eftir Bjarna á vef ráðuneytisins.
„Ég hef verið fylgjandi því að fólk utan evrópska efnahagssvæðisins hafi aukna möguleika til að koma hér til starfa. Þróun tækni kallar á það að við séum opin og sveigjanleg gagnvart vaxandi tækifærum sem skapast þegar sífellt fleiri störf eru óháð dvalarstað. Regluverkið þarf að taka mið af þessu og samvinna og sameiginlegur vilji ráðuneyta er nauðsynleg forsenda þess að vel takist til,“ er haft eftir Áslaugu Örnu, í tilkynningu ráðuneytanna þriggja sem koma að málinu.
