Heimsfaraldur, snjóþyngsli, sértæk velferðarþjónusta og aukin fjármagnsgjöld vegna hækkandi verðbólgu settu strik í rekstur Reykjavíkurborgar á fyrstu þremur mánuðum ársins.
Fjármála- og áhættustýringarsvið Reykjavíkurborgar lagði í dag fram óendurskoðað rekstraruppgjör A-hluta fyrir tímabilið janúar til mars. Rekstrarniðurstaðan er neikvæð um 4.793 milljónir króna en áætlun gerði ráð fyrir að hún yrði neikvæð um 2.894 milljónir á tímabilinu.
Segir í tilkynningu að þetta skýrist af auknum launa- og rekstrarútgjöldum sem að hluta til má rekja til afleiðinga kórónuveirufaraldurs í upphafi árs, sem krafðist meiri mönnunar og yfirvinnu í velferðarþjónustu og skólastarfi en gert var ráð fyrir.
Vetrarþjónusta var 451 milljón yfir fjárheimildum vegna snjóþyngsla á tímabilinu og gjöld vegna vistunar barna með alvarlegar þroska- og geðraskanir voru 326 milljónum yfir fjárheimildum.
Þá voru fjármagnsgjöld að frádregnum fjármunatekjum 910 milljónum yfir fjárheimildum, einkum þar sem verðbólga er töluvert hærri en fjárhagsáætlun gerði ráð fyrir.