Þann 25. maí næstkomandi verður aðalmeðferð í Héraðsdómi Reykjavíkur yfir rúmlega þrítugu pari þar sem við sögu koma mikið magn af fíkniefnum og öðrum ólöglegum efnum, sem og ólöglegur vopnaburður.
Bæði eru ákærð fyrir stórfellt fíkniefnabrot í kjölfar húsleitar á heimili þeirra í Þórðarsveig í Reykjavík en þar fundust „658,89 g af amfetamíní, 79,71 g og 294 töflur af ecstasy, 56,02 g af hassi, 16,25 g af kannabislaufi, 88,40 g af kókaíni, 110,95 g af maríhúana og 134 stykki af LSD, en fíkniefnin voru ætluð til söludreifingar í ágóðaskyni hér á landi og fundust við leit lögreglu 7. júlí 2020,“ eins og segir í ákæru.
Maðurinn er síðan ákærður fyrir vopnlagabrot fyrir að hafa í Þórðarsveig haft undir höndum hálfsjálfvirka haglabyssu án skotvopnaleyfis og bitvopn með 14 cm hnífsblaði. Ennfremur er maðurinn ákærður fyrir að hafa haft undir höndum mikið magn af anabólískum sterum.
Konan er ákærð fyrir að hafa haft í fórum sínum: „5 töflur af Viagra, 48 belgi af Medikinet Cr, 116 töflur af Alprazolam Krka og 20 töflur af Tradolan, en fíknilyfin fundust við leit lögreglu.“
Krafðist er upptöku á öllu því sem hér er nefnt (og tiltekið er nákvæmar í ákæru málsins) sem og þess að fólkið verði dæmt til refsingar og greiðslu alls sakarkostnaðar.
