Minnkun SAS eina lífsvon Flyr

Nýja norska flug­fé­lagið Flyr, sem fór í loftið með pompi og prakt 30. júní 2021, berst nú í bökk­um fjár­hags­lega og kveður hag­fræðipró­fess­or ein­fald­lega ekki pláss fyr­ir Flyr á markaðnum nema skandi­nav­íska flug­fé­lagið SAS dragi sam­an segl­in.

Flyr fór í gegn­um end­ur­fjármögn­un í nóv­em­ber í fyrra sem átti að tryggja því 700 millj­óna norskra króna björg­un­ar­hring, upp­hæð sem nem­ur rúm­um tíu millj­örðum ís­lenskra króna. Var björg­un­in þó háð því að verð hluta­bréfa fé­lags­ins héld­ist að lág­marki einn eyr­ir, 0,14 ís­lensk­ar krón­ur, á hlut, en það mark náðist ekki.

Þegar fregn­ir bár­ust svo af því um helg­ina að á morg­un færi eng­in vél á veg­um Flyr í loftið féllu bréf fé­lags­ins um rúm 70 pró­sent við opn­un markaða í morg­un.

„Hrein­lega ekki pláss“

Téður pró­fess­or er Frode Steen við Norska viðskipta­há­skól­ann NHH. „Fé­lagið hóf störf á markaði þar sem þegar var þröngt á þingi,“ seg­ir Steen við norska rík­is­út­varpið NRK, „fé­lagið reiknaði með að rýmið yk­ist. Það gerðist ekki. Ofan á það hef­ur [flug­fé­lagið] Wi­derøe róið meira á er­lend mið en áður svo þrengsl­in hafa enn auk­ist. Góð viðskipta­áætl­un og góð frammistaða dug­ir ekki til. Það er hrein­lega ekki pláss,“ seg­ir pró­fess­or­inn.

Svo úr þessu ræt­ist þurfi SAS að draga úr um­svif­um sín­um. „Flyr þarf að þreyja þorr­ann þar til í mars eða apríl. Þá verður meira vitað um hvað ger­ist hjá SAS og þá má vera að landið taki að rísa, en fé­lagið þarf að verða sér úti um fé svo vel fari, það er að tapa núna og alls óvíst að það kom­ist á rétt­an kjöl,“ seg­ir Steen enn frem­ur.

Flyr hef­ur flogið mikið í leiguflugi fyr­ir ferðaskrif­stof­una Ving og seg­ir talsmaður henn­ar við TV2 að viðskipta­vin­irn­ir fái að finna fyr­ir vand­ræðum Flyr með áþreif­an­leg­um hætti hvað snert­ir flug til Mall­orca, Krít­ar og Teneri­fe sem nú fell­ur niður á morg­un og eng­inn veit hvað verður eft­ir það.

NRK

E24

TV2

• Blogga um frétt