Undanfarið hefur Póstinum borist tilkynningar vegna dularfullra sendinga sem Íslendingar fá frá Salómonseyjum. En viðtakendurnir kannast stundum ekkert við þessar sendingar. Þetta kemur fram í tilkynningu frá Póstinum.

Þessar sendingar hafa komist í umræður á samfélagsmiðlum en þar hafa margskonar kenningar verið settar fram um þessar dularfullu sendingar.

Salómonseyjar eru eyríki í Suður-Kyrrahafi. Um er að ræða eyjaklasa sem telur hátt í þúsund eyjar.

Kristín Inga Jónsdóttir, markaðsstjóri Póstsins hefur tjáð sig um málið, en hún segir að ekkert hættulegt sé á seiði, og útskýrir hvers vegna sendingar frá Salómonseyjum berist svo gjarnan til Íslands.

„Við hjá Póstinum erum meðvituð um málið og góðu fréttirnar eru þær að c Pakkar frá Ali Express eru sendir í gegnum Salómonseyjar þar sem það er ódýrasta leiðin til Íslands. Ef einhverjir hafa keypt vöru á Ali Express á síðastliðnum 1-2 mánuðum eru allar líkur á að um sé að ræða pakkann sem viðkomandi pantaði,“ segir hún og bætir við:

„Mikilvægt er að passa upp á að bera saman sendingarnúmerið sem viðkomandi fékk sent frá Ali og sendingarnúmerið í tilkynningunni frá okkur til að vera viss um að þetta sé sendingin sem beðið er eftir. Ef viðkomandi hefur fengið tilkynningu um pakka frá Salómonseyjum en er ekki að bíða eftir pakka frá Ali er gott að hafa samband við þjónustuver Póstsins og við skoðum málið.“

Kristín segir að í einhverjum tilvikum sé um tóma pakka að ræða og er fylgst sérstaklega vel með því. Ef grunur leikur á að pakkar séu tómir eru þeir teknir úr umferð. „Ef viðskiptavinir sjá á Mínum síðum Póstsins eða í appinu að sendingin sem þeir hafa fengið tilkynningu um er óvenju létt gæti verið gott að hafa samband við þjónustuverið. Við mælum raunar með því að viðskiptavinir okkar hafi samband við þjónustuver Póstsins ef þeir eru að fá dularfullar sendingar frá Salómonseyjum,“