Alexei Navalní, einn helsti stjórnarandstæðingur Rússlands, hefur verið með hita og þrálátan hósta undanfarna daga. Hann dvelur nú í fangelsi vegna dóms sem hann hlaut fyrir spillingu og hann segir að dæmi séu um berklasmit innan veggja fangelsisins.
Lögmenn Navalnís segja hann illa á sig kominn og hafa grennst óeðlilega mikið í kjölfar hungurverkfalls. BBC greinir frá.
Navalní var handtekinn við komuna til Rússlands í janúar og dæmdur til fangelsisvistar skömmu síðar. Hann var þá nýkominn frá Þýskalandi þar sem hann þáði læknismeðferð eftir að rússnesk stjórnvöld eitruðu fyrir honum.