Innlent

Um­dæmis­læknir sótt­varna hefði viljað hafa skipið ná­lægt höfn

Hallgerður Kolbrún E. Jónsdóttir skrifar
22 af 25 skipverjum á Júlíusi Geirmundssyni reyndust smitaðir af Covid-19.
22 af 25 skipverjum á Júlíusi Geirmundssyni reyndust smitaðir af Covid-19. Vísir/Hafþór

Umdæmislæknir sóttvarna á Vestfjörðum segir að hún hefði viljað hafa frystiskipið Júlíus Geirmundsson nálægt höfn eftir að skipverjar tilkynntu henni um grun um kórónuveirusmit um borð. Hópsmit kom upp í skipinu og smituðust 22 af 25 skipverjum um borð.

„Þetta er allt hið leiðinlegasta mál. Þegar maður horfir aftur í tímann þá hugsar maður kannski að það væri hægt að hafa gert þetta öðruvísi og það væri hugsanlega hægt að hafa greint þetta fyrr þannig að það væri þá hægt að koma í veg fyrir smit,“ sagði Súsanna Björg Ástvaldsdóttir umdæmislæknir sóttvarna á Vestfjörðum í Reykjavík síðdegis í dag.

Á heimasíðu Verkalýðsfélags Vestfirðinga segir að Hraðfrystihúsið Gunnvör (HG) hafi hudsað tilmæli um viðbrögð frá sóttvarnayfirvöldum. Framkvæmdastjóri HG og skipstjóri skipsins viðurkenndu síðar að eftir á að hyggja hefði átt að fara fyrr í land. Þeir hafi þó verið í samandi við sóttvarnalækni.

Ekki hægt að staðfesta að um kvef sé að ræða með samtali

„Ef það er grunur um smitsjúkdóm þá ber að fara eftir einhverjum ákveðnum verkferlum. Þeir hringdu í mig og báru þetta undir mig og mín skilaboð hafa alltaf verið skýr, frá upphafi faraldursins, að ef fólk er með einkenni þá þarf það að koma í sýnatöku og það að eiga samtal við mig um að staðfesta að þetta sé kvef er bara ekki til. Fólk verður að mæta í sýnatöku. Það er enginn munur á covid og kvefi,“ segir Súsanna.

Skipverjarnir sóttu í dag fund með Verkvest og greindu þeir frá því að margir þeirra hafi verið alvarlega veikir í þriggja vikna túr á miðunum. Þeir hafi verið með mikinn hita, öndunarörðugleika auk fleiri þekktra einkenna Covid-19. Ástandið um borð hafi verið mjög alvarlegt en þrátt fyrir að hafi hvorki skipstjóri né útgerð séð ástöðu til að tilkynna um veikindin til sóttvarnayfirvalda eða Landhelgisgæslu né að halda skipi til hafnar til að framkvæma sýnatöku.

„Mikilvægt að hringja strax og tilkynna veikindi“

Skipverjar segja jafnframt að Súsanna hafi lýst því yfir að hún vildi fá skipverja í sýnatöku á þriðja degi veiðiferðar.

„Ég hugsaði það þannig að ég myndi ekki endilega vilja hafa þá bundna við höfn á meðan við vorum að komast að niðurstöðu en vera nálægt höfninni. Ef það skyldi og verða einhver veikindi um borð þá gætum við gripið inn í og náð í veika menn,“ segir Súsanna.

„Það er mjög mikilvægt að hringja strax og tilkynna veikindi og ef mig minnir rétt þá eru verkferlar um að láta Landhelgisgæsluna vita um veikindi um borð. Sérstaklega þegar veikindi verða að fleiri en tveimur sjómönnum þá fer mann að gruna smitsjúkdóma. Þá er mjög mikilvægt að gripið sé strax inn í svo þessi smitsjúkdómur dreifi sér ekki víðar [um borð].“


Tengdar fréttir

Bannað að segja fjölmiðlum frá veikindum sínum um borð

Skipverjar á frystiskipinu Júlíusi Geirmundssyni segjast margir hverja hafa verið alvarlega veikir í þriggja vikna túr á miðunum. Þeir hafi verið með mikinn hita, öndunarörðugleika auk fleiri þekktra einkenna Covid-19 sjúkdómsins.

„Þetta er ljóta helvítis yfirklórið og drullumokstur“

Súsanna Björg Ástvaldsdóttir‎, umdæmislæknir sóttvarna á Vestfjörðum, segir tilmæli sín mjög einföld þegar komi að einkennum vegna Covid. Skipti þá engu hvort menn séu á sjó eða í landi. Menn eigi að koma í sýnatöku.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×