Knattspyrnumaðurinn Ísak Óli Ólafsson leikur ekki meira með uppeldisfélagi sínu Keflavík í sumar. Ísak Óli snýr nú aftur til Danmerkur, þar sem hann er að ganga til liðs við Esbjerg frá SønderjyskE þar í landi.
Ísak Óli gekk til liðs við Keflavík á láni frá SønderjyskE í mars og hefur spilað sex af sjö leikjum liðsins í úrvalsdeild karla, Pepsi Max-deildinni, í sumar.
Esbjerg, sem leikur í dönsku B-deildinni, er hins vegar að kaupa miðvörðinn frá úrvalsdeildarfélaginu Sønderjyske.
Samkvæmt tilkynningu frá Keflavík er Ísak Óli á leiðinni til Danmerkur í dag og gengst undir læknisskoðun hjá Esbjerg á sunnudag.