Karen Mist Kristjánsdóttir hefur verið ráðin verkefnastjóri Græns iðngarðs á Bakka. Hún mun leiða vinnu við uppbyggingu starfseminnar í anda nýsköpunar, loftslagsmála og orkuskipta, en starfið er nýtt hjá Norðurþingi og Eimi, að því er fram kemur í tilkynningu.
Karen mun hefja störf 1. febrúar, starfsstöðin verður á Húsavík en hún mun vinna í teymi með Eimi.
„Karen er lífferlatækniverkfræðingur og hefur verið búsett í Danmörku síðustu misseri. Hún starfaði síðast sem sölustjóri hjá Alumichen þar sem verkefni hennar lutu meðal annars að búnaði og ferlum í tengslum við vatnshreinsun, endurnýtingu vatns, úrgangs og annarra auðlinda auk þess sem hún var teymisstjóri.
Karen hefur mikla reynslu af verkefnastjórnun og samvinnu með hagsmunaaðilum og fyrirtækjum í verkefnum m.a. í tengslum við uppbyggingu umhverfisvænna ferla og endurnýtingu hráefna,“ segir í tilkynningunni.