Íslenska sveitin gekk inn á Ólympíuleikvanginn í Tókýó rétt áðan, eða klukkan 11.40 að íslenskum tíma.
Sundfólkið Snæfríður Sól Jórunnardóttir og Anton Sveinn McKee bar íslenska fánann í sameiningu en nú er í fyrsta skipti heimilað að fánaberar séu tveir, karl og kona, þar sem því verður við komið.
Aðeins fjórir Íslendingar keppa á leikunum að þessu sinni en auk sundfólksins eru það skotmaðurinn Ásgeir Sigurgeirsson og kringlukastarinn Guðni Valur Guðnason. Með keppendunum gengu fulltrúar úr fylgdarliði þeirra inn á leikvanginn.
Grikkir gengu að vanda inn fyrstir þjóða, þá kom sveit flóttamanna og síðan var röðin komin að Íslandi. Ástæða þess er sú að í japanska stafrófinu er Ísland fyrst allra þjóða heims.