Kári Stef­áns­son, for­stjóri Íslenskrar erfða­grein­ing­ar, segir að nið­ur­stöður úr skimun fyr­ir­tæk­is­ins eftir mótefnum gegn kór­ónu­veirunni, í blóð­sýnum sem tekin voru skömmu fyrir ára­mót, sýni það að umtals­vert fleiri hafi smit­ast af kór­ónu­veirunni en búið hafi verið að greina í PCR-­prófum á þeim tíma­punkti.

Hversu mikið fleiri er erfitt að segja, að sögn Kára, en hann segir nið­ur­stöð­urnar gefa til kynna að um 20 pró­sent af þeim sem séu undir 40 ára aldri hafi smit­ast af kór­ónu­veirunni og segir við Kjarn­ann að jafn­vel séu vís­bend­ingar um að allt að 130 þús­und íbúar á Íslandi hafi smit­ast af kór­ónu­veirunni nú þeg­ar.

„En allir þessir útreikn­ingar eru allir hrika­lega óná­kvæmir og að öllum lík­indum eru töl­urnar sem ég er að tala um aðeins meiri en raun­veru­leik­inn segir okk­ur, en það er ekk­ert víðs­fjarri,“ segir Kári við blaða­mann.

Myndin verði skýr­ari í febr­úar

Kári segir við Kjarn­ann að þessar nið­ur­stöður sem hann sé að draga álykt­anir út frá eigi við um sam­fé­lagið eins og það var fyrir um fjórum vikum síð­an.

Síðan þær blóðprufur voru teknar hafa greind smit í PCR-­prófum síðan nær und­an­tekn­inga­laust verið yfir þús­und tals­ins á degi hverj­um. Frek­ari blóðprufur voru teknar af hálfu Íslenskrar erfða­grein­ingar fyrir rúmri viku síðan og nið­ur­stöður úr grein­ingu á þeim eru vænt­an­legar um miðjan febr­ú­ar, segir Kári. Þá verður meira hægt að segja um stöð­una eins og hún er í dag.

Í dag eru alls 11.109 manns með stað­fest smit og í ein­angr­un, sam­kvæmt tölum á töl­fræði­vef yfir­valda og stað­fest smit á land­inu orðin 58.409 – sem jafn­gildir því að um 16 pró­sent íbúa á Íslandi hafi fengið COVID-19.

Pestin gæti verið búin að hlaupa sitt skeið í apríl

Kári telur þó að hlut­fallið sé enn hærra og notar töl­una 2,7 sem marg­feldi til þess að áætla raun­veru­lega útbreiðslu veirunnar um sam­fé­lag­ið, og byggir það á nið­ur­stöð­unum úr blóðpruf­unum í lok des­em­ber.

Hann vill ekki full­yrða of mikið í sam­tali við blaða­mann, en segir nið­ur­stöð­urnar úr blóð­tök­unni í lok des­em­ber þó veita þær vís­bend­ingar að smit í sam­fé­lag­inu séu tölu­vert útbreidd­ari en opin­berar tölur sýni.

„Þetta er nátt­úr­lega algjör­lega óleið­rétt fyrir aldri og öllu slíku, það eina sem þetta segir okkur er að í dag erum við að öllum lík­indum komin með ansi mikið smit í sam­fé­lag­ið. En við komum til með að vita þetta eftir um það bil þrjár vik­ur,“ segir Kári.

„Mér sýnist, eins og maður horfir á þetta núna, að þessi pest verði búin að hlaupa sitt skeið í apr­íl, eða svo,“ segir Kári.