Tveir kennarar í leikskólanum Laufásborg hafa greinst með kórónuveiruna. 24 nemendur eru komnir í sóttkví.
Matthildur Laufey Hermannsdóttir, annar tveggja skólastjóra Laufásborgar, segir við mbl.is að börnin fari í skimun þegar sóttkví lýkur, en það veltur á því hvenær hvert barn fyrir sig var síðast í skólanum.
Allir kennarar og starfsmenn við Laufásborg eru bólusettir. Fyrra smitið greindist á sunnudag og það seinna í gær.
Matthildur segir að foreldrar barnanna hafi tekið sóttkvínni af miklu æðruleysi og að börnin séu í góðum málum.