Berglind Björg Þorvaldsdóttir, landsliðskona í knattspyrnu, er gengin í raðir Íslandsmeistara Vals frá franska stórliðinu París SG.
Valur hefur ekki tilkynnt formlega um skiptin en á heimasíðu KSÍ kemur fram að Berglind Björg sé komin með leikheimild hjá Val.
Hún hefur verið í barneignarleyfi eftir að hafa eignast sitt fyrsta barn undir lok síðasta árs en snýr brátt aftur á völlinn.
Berglind hefur skorað tólf mörk í 72 landsleikjum. Hún hefur leikið með Breiðabliki, ÍBV og Fylki á Íslandi. Erlendis hefur hún leikið með Hellas Verona, PSV, AC Milan, Le Havre, Hammarby, Brann og loks París SG.
Þá er Berglind áttunda markahæsta konan í sögu efstu deildar hér á landi en hún hefur skorað 137 mörk í 190 leikjum í deildinni. Þar af eru 105 mörk í 141 leik með Breiðabliki.