Handknattleiksmaðurinn Alexander Petersson verður frá keppni næstu vikurnar vegna meiðsla sem hann varð fyrir í leik Rhein-Neckar Löwen og Leipzig um síðustu helgi.
Alexander er með rifu í festingum þríhöfða upphandleggs við vinstri öxl. Hann staðfesti í samtali við Handbolta.is að hann yrði frá í þrjár til fjórar vikur.
Löwen hefur farið nokkuð vel af stað í þýsku 1. deildinni og unnið þrjá leiki og tapað einum af fyrstu fjórum leikjunum. Ýmir Örn Gíslason leikur einnig með liðinu.