Ítalska félaginu Juventus bauðst að fá N'golo Kante í skiptum fyrir Matthijs de Ligt í janúar en félagið hafnaði boðinu. Þetta kemur fram í nokkrum miðlum í dag.
Chelsea vildi fá De Ligt í janúarglugganum og lagði því til að Kante færi í hina áttina.
Kante hefði verið sterk viðbót við miðjuna hjá Juventus, sem var þó ekki til í skiptin.
De Ligt endaði á að yfirgefa Juventus en hann gekk í raðir Bayern München í sumar fyrir 77 milljónir evra.
Framtíð Kante hjá Chelsea er í mikilli óvissu. Samningur hans gildir út tímabilið, en hann hefur aðeins spilað tvo leiki fyrir liðið á tímabilinu.
Það er alla vega ljóst að Juventus væri betur sett með Kante í liðinu en Massimo Allegri, þjálfari ítalska félagsins, hefur þurft að byrja með hinn 19 ára gamla Fabio Miretti á miðsvæðinu vegna manneklu. Juventus er í 8. sæti Seríu A og þá tapað fyrstu tveimur leikjum sínum í Meistaradeild Evrópu.
Athugasemdir