Sverrir Ingi Ingason, varafyrirliði karlalandsliðsins í fótbolta, telur að spennustigið í liðinu fyrir úrslitaleikinn gegn Úkraínu í Wroclaw í Póllandi sé gott.
Sverrir sat fyrir svörum á fréttamannafundi eftir æfingu á Tarczynski-leikvanginum í dag.
„Mér finnst að spennustigið hafi verið mjög fínt hingað til. Við sáum á fyrstu fimmtán mínútunum í leiknum gegn Ísrael að það var mikið undir, við fengum smjörþefinn af því þar, en við vitum að við mætum gríðarlega sterku liði Úkraínumanna á morgun," sagði Sverrir Ingi.
„Við þurfum því að vera sérstaklega tilbúnir fyrstu fimmtán mínúturnar, megum vera viðbúnir því að þeir setji pressu á okkur og við verðum að geta staðist hana. Fundið taktinn í okkar leik í framhaldi af því.
Mér finnst stemningin í hópnum hafa verið mjög góð. Við vitum hvers konar liði við mætum á morgun þannig að við erum vel undirbúnir," sagði Sverrir Ingi.