Miklu landað af kolmunna í janúar á Fáskrúðsfirði

Loðnuvinnslan á Fáskrúðsfirði hefur tekið á móti 13.500 tonnum af kolmunna í janúar. Hafa færeysk skip komið með megnið af kolmunnanum til löndunar.

Þegar fréttaritara Morgunblaðsins bar að garði í gær var verið að landa úr Hoffelli SU 80. Kom Hoffellið með 2.100 tonn af kolmunna og var þetta fyrsta veiðiferð skipsins á kolmunna eftir að Loðnuvinnslan keypti skipið í fyrra. Hoffellið mun halda kolmunnaveiðum áfram en skipið var við veiðar um 100 mílur suður af Færeyjum.

Í gær var von á norsku skipi til hafnar á Fáskrúðsfirði með um 300 tonn af loðnu til frystingar.