Argentína er með fullt hús stiga í undankeppni Suður-Ameríku um sæti á lokamóti HM í Katar veturinn 2022 eftir 2:1-útisigur á Bólivíu í kvöld.
Marcelo Moreno kom Bólivíu óvænt yfir á 24. mínútu en Lautaro Martínez jafnaði í blálok fyrri hálfleiks og var staðan í leikhléi því 1:1. Þannig var hún allt fram á 79. mínútu þegar varamaðurinn Joaquín Correa skoraði sigurmark eftir stoðsendingu Martínez.
Vann Argentína 1:0-sigur á Ekvador í fyrstu umferðinni og er fyrsta liðið til að fagna tveimur sigrum í undankeppninni til þessa.
Fjögur efstu liðin í Suður-Ameríku komast beint á HM 2022 en fimmta liðið fer í umspil. Í síðustu leikjunum í annarri umferðinni mætast Ekvador - Úrúgvæ, Venesúela - Paragvæ, Perú - Brasilía og Síle og Kólumbía í nótt.