Rafmagnslaust varð víðs vegar um Pakistan í nótt vegna bilunar sem hefur haft áhrif á yfir 220 milljónir manna, þar á meðal fjölmennar borgir á borð við Karachi og Lahore.
Dreifikerfi raforku í Pakistan er bæði flókið og viðkvæmt. Bilun á einum stað getur leitt til rafmagnsleysis um allt landið.
Viðgerðir standa yfir og það tókst að koma rafmagni aftur á að hluta til í höfuðborginni Islamabad og borginni Peshawar í norðvesturhluta landsins.
Enn er rafmagnslaust í hafnarborginni Karachi, þar sem yfir 15 milljónir manna búa, og í Lahore, þar sem yfir 10 milljónir búa.
Síðast varð rafmagnsleysi af þessari stærðargráðu árið 2021 þegar myrkur skall á í öllu Pakistan eftir bilun í rafkerfi í suðurhluta landsins.