Innlent

Hefur fengið líf­láts­hótanir vegna söngsins

Árni Sæberg skrifar
Jessica Pearson hefur orðið fyrir grófu neteinelti vegna tónlistaratriðis um borð í Icelandair. Farþegar tóku þó vel í athæfið, þeirra á meðal var herramaðurinn til hægri sem ákvað að slá taktinn með skeiðum.
Jessica Pearson hefur orðið fyrir grófu neteinelti vegna tónlistaratriðis um borð í Icelandair. Farþegar tóku þó vel í athæfið, þeirra á meðal var herramaðurinn til hægri sem ákvað að slá taktinn með skeiðum. Vísir

Söngkonan Jessica Pearson hefur fengið slæma útreið á samfélagsmiðlum eftir að myndband af henni að syngja fyrir farþega flugvélar Icelandair, sem sátu fastir í flugvélinni í tíu klukkustundir, fór í dreifingu. Henni hafa borist líflátshótanir og hún hefur verið hvött til þess að svipta sig lífi.

Vísir greindi frá því á dögunum að hljómsveitin Jessica Pearson and the East Wind hafi skemmt farþegum flugvélarinnar með því að taka nokkur frumsamin lög og síðan óskalög. Flugvélin sat föst á flugbrautinni á Keflavíkurflugvelli vegna mikillar hálku og vindhraða þann 22. janúar síðastliðinn.

Óskar Tryggvi Svavarsson, flugstjóri flugvélarinnar, sagði í samtali við Vísi að farþegar hafi tekið vel í uppátæki hljómsveitarinnar eftir langa setu um borð. Allir hafi farið frá borði með bros á vör.

Segja myndskeið hafa verið tekið úr samhengi

Vísir var ekki eini miðillinn sem fjallaði um málið en það vakti meðal annars athygli fjölmiðla í Nýja-Sjálandi og Ottawa í Kanada, þar sem Jessica Pearson býr.

Í yfirlýsingu Töru Shannon, útgefanda hljómsveitarinnar, vegna málsins segir að farþegar hafi kunnað vel að meta tónlistaratriði hljómsveitarinnar og hafi hrósað hljómsveitarmeðlimum í hástert og gefið þeim súkkulaði.

Hún segir að Jessica hafi deilt myndskeiði af söngnum á samfélagsmiðlinum TikTok.

„Við sátum föst í flugvélinni á Íslandi í tíu klukkustundir vegna 115 kílómetra vindhraða. Sem betur fer vorum við með hljóðfærin okkar um borð og ákváðum að hefja fjöldasöng,“ ritaði hún með myndskeiðinu.

„Þegar litið er til baka sjáum við að myndskeiðið í færslunni málaði ekki nákvæma mynd af öllu málinu,“ segir í yfirlýsingu útgefandans.

Falsfréttir hafi ýtt undir neteinelti

Shannon segir að myndbandið hafi síðan farið í mikla dreifingu á samfélagsmiðlum undir þeim formerkjum að hljómsveitin hafi upp á eigið einsdæmi ákveðið að syngja fyrir farþegana í heilar tíu klukkustundir.

Sú falska lýsing á atburðum hafi ýtt undir gríðarlega neikvæð viðbrögð netverja og að hljómsveitinni hafi jafnvel borist líflátshótanir vegna þess. Því hafi verið ákveðið að taka myndbandið af samfélagsmiðlum en það hafi verið of seint. 

Myndbandið hafi þegar verið afritað og því dreift af stórum miðlum vestan hafs. Þeir hafi með því haldið falskri frásögn á lofti og ýtt undir neteinelti, sem sé bæði óábyrgt og hættulegt.

„Ég er í áfalli og ég læt mér hugfallast vegna þess að sameiginlegri gleðistund hefur verið breytt í óvægna árás. Hatrið er óskiljanlegt. Mér hefur verið sagt að svipta mig lífi vegna þess að ég flutti lög fyrir fólk í flugvél. Það er brjálað,“ er haft eftir Pearson í yfirlýsingunni.

Falleg minning fyrir alla 

Þá segir að Pearson sé fagmaður í gegn og virtur tónlistarmaður, bæði í heimalandinu Kanada og víðar. Hún hafi verið beðin um að deila tónlist sinni til þess að sefa farþega í erfiðum aðstæðum, og fallist á þá beiðni.

„Þetta er falleg minning sem farþegar, áhöfn og hljómsveitin deila af því að tónlistin tengir okkur öll. Það er eina fréttin í þessu máli,“ segir í lok yfirlýsingar.

Yfirlýsinguna má lesa í heild sinni í tengdum skjölum hér að neðan.

Tengd skjöl


Tengdar fréttir

Fötluð kona föst í flug­vél með stífluðu klósetti

Fötluð kona hefur setið föst í vél Icelandair í rúmlega tíu klukkutíma. Vinir hennar sem komust úr vélinni segja klósettin í vélinni vera stífluð og að enginn matur sé þar. Það virðist sem fáir á flugvellinum nái einhverju sambandi við Icelandair til að nálgast upplýsingar um stöðu mála. 

Flug­vél hring­snerist og rakst í land­gang

Flugvél Icelandair snerist á staðnum á Keflavíkurflugvelli vegna hálku og vinds. Vinstri vængur vélarinnar rakst í landgang við flugstöðina. Vélin var blessunarlega tóm og engan sakaði.

Flugi af­lýst og fólk enn fast í flug­vélum níu tímum eftir lendingu

Icelandair hefur ákveðið að aflýsa öllu flugi sínu til Norður-Ameríku og Evrópu utan flugs til Ósló og Kaupmannahafnar sem seinkað verður fram á kvöld. Aftakaveður er á flugvellinum svo ekki er talið öruggt að fara með stigabíla að flugvélum sem eru úti á vellinum. Farþegar sex véla sitja því enn fastir.

Hurð rifnaði af flugvallarbíl

Hurð rifnaði af bíl á Keflavíkurflugvelli fyrir skömmu. Vindhraði er mikill á vellinum og erfiðlega hefur gengið að ná fólki út úr flugvélum sem sitja þar fastar.

Hafa nú verið í vélinni í um tólf klukku­stundir

Farþegar í flugi Icelandair frá New York í nótt hafa nú varið um tólf klukkustundum um borð í flugvélinni, þar af sex á flugbraut í Keflavík. Einn farþeganna segir stemninguna í vélinni merkilega góða miðað við aðstæður.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×