Caroline Seger reyndist hetja Rosengård þegar liðið fékk St. Pölten í heimsókn í fyrri leik liðanna í sextán liða úrslitum Meistaradeildar kvenna í knattspyrnu í Malmö í dag.
Leiknum lauk með 2:2-jafntefli en Seger jafnaði metin fyrir Rosengård í uppbótartíma.
Mateja Zver frá Slóveníu sem lék með Þór/KA í fjögur ár kom St. Pölten yfir á 21. mínútu og hún bætti við öðru marki strax í upphafi síðari hálfleiks.
Sanne Troelsgaard minnkaði muninn fyrir Rosengård á 68. mínútu áður en Seger tryggði sínu liði jafntefli.
Glódís Perla Viggósdóttir lék allan leikinn í hjarta varnarinnar hjá Rosengård en Kristrún Rut Antonsdóttir kom inn á sem varamaður hjá St. Pölten á 76. mínútu.
Liðin mætast á nýjan leik í Austurríki eftir viku.