Þorgerður Katrín Gunnarsdóttir, formaður Viðreisnar, er harður stuðningsmaður Liverpool í enska boltanum. Hún telur að liðið muni standa uppi sem sigurvegari í bæði ensku úrvalsdeildinni og Meistaradeild Evrópu á þessari leiktíð. Hún ræddi þetta í þættinum Chess After Dark í gær.
,,Já, við gerum það,“ sagði Þorgerður, spurð út í það hvort að hún teldi að Liverpool myndi vinna titil á tímabilinu.
,,Þetta lúkkar vel, það var aðeins gagnrýni á innkaupin hjá honum (Jurgen Klopp, stjóra Liverpool), lítil innkaup,“ bætti hún við. Liverpool fékk aðeins einn leikmann til liðs við sig í sumarglugganum, Ibrahima Konate frá RB Leipzig.
Miðvörðurinn Virgil van Dijk var frá vegna meiðsla stærsta hluta síðustu leiktíðar. Hann er, sem betur fer fyrir Liverpool, snúinn aftur núna.
,,Það var þess vegna sem við unnum þetta ekki, mér finnst það,“ sagði Þorgerður um Hollendinginn.
,,Ég held að við munum ná bæði að vinna enska titilinn og Meistaradeildina. Ég held að við náum ekki að vinna bikarinn.“
Liverpool er sem stendur í öðru sæti ensku úrvalsdeildarinnar með 13 stig eftir fimm leiki.