Aga- og úrskurðarnefnd KSÍ vísaði frá kærum Fram og KR um þá ákvörðun stjórnar KSÍ að hætta keppni á Íslandsmótinu 2020. Félögin hafa nú þrjá daga til að áfrýja úrskurðinum til áfrýjunardómstóls sambandsins.
Páll Kristjánsson, formaður knattspyrnudeildar KR, staðfesti í samtali við Vísi í dag að KR-ingar myndu „fara með þetta mál lengra“. Ásgrímur Helgi Einarsson, formaður knattspyrnudeildar Fram, sagði við Vísi að málið væri til skoðunar hjá félaginu.
KR var í fimmta sæti úrvalsdeildar karla, Pepsi Max-deildarinnar, þegar ákveðið var að hætta keppni á meðan Framarar voru í þriðja sæti 1. deildarinnar, Lengjudeildarinnar. KR missti af Evrópusæti en Fram missti af sæti í efstu deild og ákváðu bæði félög að kæra ákvörðun stjórnar KSÍ um að hætta keppni á mótinu.
„Af framangreindum ákvæðum reglugerðar KSÍ um aga- og úrskurðarmál leiðir að ekki er gert ráð fyrir að ákvarðanir sem teknar eru af KSÍ eða í þessu tilfelli stjórn KSÍ sæti kæru til aga- og úrskurðarnefndar nema sérstök heimild liggi til þess í lögum eða reglugerðum KSÍ,“ segir meðal annars í úrskurði aganefndarinnar.