Sá fyrsti síðan Larry Bird

Jayson Tatum skellti sér í sögubækurnar er hann skoraði 53 stig fyrir Boston Celtics í 145:136-sigri gegn Minnesota Timberwolves í NBA-deildinni í körfuknattleik í nótt.

Ekki bara varð Tatum, 23 ára, yngsti leikmaðurinn í sögu Boston til að skora yfir 50 stig í einum leik heldur einnig sá fyrsti til að gera það fyrir liðið síðan goðsögnin Larry Bird sem spilaði með Boston á árunum 1979 til 1992.

Sigurinn reyndist torsóttur fyrir Boston sem situr í 7. sæti austurdeildarinnar en lið Minnesota er á botni vesturdeildarinnar. Karl-Anthony Towns skoraði 30 stig og tók 12 fráköst fyrir gestina er leikurinn fór alla leið í framlengingu.

Úrslitin í nótt
Orlando – Indiana 106:111
Boston – Minnesota 145:136 e.f.
New York – Memphis 133:129 e.f.
Atlanta – Chicago 120:108
New Orleans – Philadelphia 101:94
Denver – San Antonio 121:119
Milwaukee – Charlotte 119:127
Golden State – Washington 107:110
LA Clippers – Houston 126:109

• Blogga um frétt