Dómskerfi Vatíkansins er ekki fært um að taka á þeim fjölda fjármunabrota sem eru framdir í lögsögu smáríkisins. Þetta er niðurstaða nýrrar skýrslu Evrópuráðsins.
Sérfræðinefnd Evrópuráðs sem leggur mat á aðgerðir gegn peningaþvætti lagði til að dómsmálaráðuneyti Frans páfa réði inn fleiri saksóknara með raunverulega reynslu af fjármunaglæpum.
Skýrslan benti einnig á manneklu innan rannsóknar- og dómskerfa Vatíkansins og vísaði þar til áralangra málaferla yfir fyrrum yfirmanni banka Vatíkansins.
Skýrslan benti þó einnig á jákvæðar hliðar fjársýslu Vatíkansins, og benti þar meðal annars á skilvirkar aðgerðir til að sporna við peningaþvætti og fjármögnun hryðjuverkasamtaka.
Páfastóll fagnaði skýrslunni og kvaðst ætla að halda áfram að vinna eftir ýtrustu alþjóðlegu stöðlum.