Ölgerðin ætlar að vera í framvarðarsveit íslenskra fyrirtækja og setja aukin kraft í að bæta ferla fyrirtækisins út frá hringrásarhagkerfinu með því meðal annars að draga úr sóun, létta plastumbúðir, auka endurunnið PET í plastflöskur, minnka kolefnisspor umbúða, auka innlenda framleiðslu drykkja sem minnkar kolefnislosun og endurnýta glatvarma frá gufukerfum. Þetta er á meðal þess sem kemur fram í nýrri sjálfbærniskýrslu Ölgerðarinnar.

Í skýrslunni er stefnu fyrirtækisins til 2024 lýst en þar segir að vöxtur, fjölbreytileiki, stafræn þróun og sjálfbærni verði að leiðarljósi og daglega sé unnið í umbótaverkefnum. Þá segir í skýrslunni að Ölgerðin ætli sér að stækka með hagkvæmum hætti og styðja þannig við hagvöxt og atvinnu.

Því verði meðal annars náð fram með aukinni framleiðni og lágmörkun á umhverfisáhrifum. Ennfremur segir að Ölgerðin sé eitt af fimm íslenskum félögum sem hafi skuldbundið sig til að vinna eftir markmiðum um sjálfbærni byggðum á vísindalegum grunni og það eina sem hefur fengið markmið sín staðfest af samtökunum SBTi.

Þá er í skýrslunni að finna upplýsingar um vistferlisgreiningu EFLU verkfræðistofu um áhrif innlendrar framleiðslu drykkjarvara í stað innflutnings og segir í niðurstöðunni að munurinn á kolefnislosun sé allt að 589%.

Hér er hægt að nálgast sjálfbærniskýrslu Ölgerðarinnar í heild sinni