Erling Braut Haaland, framherji þýska knattspyrnufélagsins Borussia Dortmund, kostar 200 milljónir evra í sumar. Það er spænski miðillinn AS sem greinir frá þessu.
Haaland hefur verið orðaður við öll stærstu félög Evrópu undanfarna mánuði en hann hefur leikið með Dortmund frá því í janúar 2020.
Hann hefur slegið í gegn í Þýskalandi en hann er einungis tvítugur og á því nóg eftir.
Framherjinn hefur verið orðaður við lið á borð við Real Madrid, Barcelona, Juventus og stærstu lið Englands en það verður að teljast ólíklegt að eitthvað félag sé tilbúið að borga uppsett verð fyrir leikmanninn í sumar.
Haaland er með klásúlu í samningi sínum sem virkjast næsta sumar en hún gerir honum kleift að yfirgefa Dortmund fyrir 75 milljónir evra næsta sumar.