Ásgeir Jónsson seðlabankastjóri og Gunnar Jakobsson, varaseðlabankastjóri fjármálastöðugleika, telja að bein áhrif af falli Silicon Valley Bank (SVB) og Signature Bank í Bandaríkjunum muni ekki verða mikil á Íslandi.

„Áhrifin geta helst komið fram ef það verður einhver smitun yfir til Evrópu, á getum við fengið áhrif þaðan,“ sagði Ásgeir á blaðamannafundi Seðlabankans í morgun.

„Við teljum okkur hafa sett þannig varnarlínur í kringum íslenska fjármálakerfið að það séu ekki endilega mikil bein áhrif. Það er mjög gott að Landsbankinn náði að gefa út [evrópsk sértryggð skuldabréf] í sömu viku. Þannig að bankarnir eru mjög vel fjármagnaðir og við sjáum ekki endilega mikil bein áhrif.“