Fram er Reykjavíkurmeistari karla í knattspyrnu í 28. skipti eftir sigur gegn Víkingi í úrslitaleik á Víkingsvelli í kvöld.
Leiknum lauk með stórsigri Framara, 4:1, en Magnús Þórðarson gerði sér lítið fyrir og skoraði tvívegis í leiknum.
Danijel Dejan Djuric kom Víkingum yfir strax á 9. mínútu og Víkingar leiddu með einu marki gegn engu í hálfleik.
Magnús jafnaði svo metin fyrir Framara strax í upphafi síðari hálfleiks og hann var aftur á ferðinni á 56. mínútu þegar hann kom Frömurum yfir, 2:1.
Karl Friðleifur Gunnarsson fékk að líta rauða spjaldið í liði Víkinga á 74. mínútu og bikarmeistararnir því einum manni færri það sem eftir lifði leiks.
Víkingar freistuðu þess að jafna metin og lögðu allt í sóknarleikinn á lokamínútunum og Framarar skoruðu tvö mörk úr skyndisóknum.
Tryggvi Snær Geirsson skoraði þriðja mark Framara á 90. mínútu og Aron Snær Ingason bætti við fjórða markinu í uppbótartíma og þar við sat.
Markaskorarar fengnir af fótbolta.net þar sem leikurinn var í beinni textalýsingu.