Eldgos gæti verið að hefjast nálægt fjallinu Keili á Reykjanesi. Kristín Jónsdóttir, hópstjóri náttúruvárvöktunar Veðurstofunnar segir í samtali við RÚV að óróapúlsinn sé að aukast. Landhelgisgæslan er að undirbúa þyrlu fyrir könnunarflug yfir svæðið.

Björgvunarsveitir á Reykjanesskaga eru í viðbragðsstöðu og búið er að virkja samhæfingarmiðstöð Almannavarna í Skógarhlíð.

Kristín segir að íbúar á Reykjanesskaganum eigi að halda sig heima. Flest bendi til að eldgos sé þegar hafið. Að sögn Kristínar ætti eldgosið ekki að raska byggð eða hafa áhrif á vegasamgöngur.

Uppfært kl. 16.05 – 16:30

Kristín staðfesti ekki orð sín úr viðtali við RÚV, í upphafi upplýsingafundar Almannavarna. Staðan er óljós en kvika er að brjóta sér leið í gegnum berg. Kvika er að brjótast úr en gos ekki hafið.

Víðir Reynisson, yfirlögregluþjónn hjá Almannavörnum, segir að engar hamfarir séu að fara í gang og fólk geti haldið áfram með líf sitt.

Kristín segir ekki miklar líkur á því að gosið verði hættulegt, ef af verður. Það geti orðið óþægilegt í nokkra daga.

Aðspurð sagði Kristín að ennþá gætu orðið stærri skjálftar en hafa orðið undanfarið.

Kristín segir ennfremur að líklegt sé að gos standi í eina til tvær vikur.

Víðir segir að Almannavarnir hafi haft bak við eyrað að eldvirknitímabil geti verið að hefjast á Reykjanesskaga með reglulegum gosum, og undirbúið sig undir það.

Búist er við flæðigosi eða hraungosi en ekki sprengigosi. Líklegt er að gosið verið lítið eða meðalstórt. Samkvæmt fundinum er ekki talið líklegt að gosið hafi áhrif á flug.

Freysteinn Sigmundsson jarðeðlisfræðingur var á fundinum og hann að gosið gæti hafist á næstu klukkustundum eða næstu dögum. Kvikan sé nálægt yfirborði og fylgjast þurfi vel með næstu klukkustundir. Það gæti líka dregist um nokkra daga að gos hefjist.