Gunnar og Gylfi vildu hækka vexti um 0,5%

Tveir nefndarmenn af fimm í peningastefnunefnd Seðlabanka Íslands, Gunnar Jakobsson og Gylfi Zoëga, greiddu atkvæði gegn þeirri tillögu Ásgeirs Jónssonar seðlabankastjóra að hækka vexti bankans um 0,25 prósentur, eins og gert var sjötta október sl. Ásgeir, Rannveig Sigurðardóttir og Katrín Ólafsdóttir greiddu atkvæði með tillögunni.

Frétt af mbl.is

Seðlabankinn hækkar stýrivexti

Vildu Gunnar og Gylfi hækka vexti meira, eða um 0,5%.

Í fundargerð nefndarinnar, sem birt hefur verið á vef Seðlabankans, segir að helstu rök sem komu fram fyrir því að taka minna skref voru þau að óvissa um alþjóðlegar efnahagshorfur væri enn nokkur. Jafnframt væri óvissa um þróun á vinnumarkaði.

Helstu rök sem fram komu fyrir því að hækka vexti um 0,5 prósentur voru þau að margt benti til þess að efnahagsumsvif hefðu tekið verulega við sér, sem birtist m.a. í töluverðum verðhækkunum á fasteignamarkaði, miklum vexti á útlánum til heimila og skorti á vinnuafli í ákveðnum greinum. Bent var á að þriðjungur fyrirtækja ætti í erfiðleikum með að ráða í lausar stöður.