Skilaði 9,5 milljörðum meira en talið var

Útflutningsverðmæti sjávarafurða árin 2020 og 2021 var 9,5 milljörðum króna meiri en áður var talið. Þetta sést í uppfærðum tölum Hagstofu Íslands.

Þannig voru fluttar úr landi sjávarafurðir fyrir tæplega 276 milljarða króna árið 2020 en ekki 270 milljarða eins og áður var talið. Jafnframt voru útflutningsverðmæti sjávarafurða rúmlega 296 milljarðar árið 2021 en ekki tæpir 293 milljarðar.

„Af ýmsum ástæðum geta orðið tafir á því að gögn berist til Hagstofunnar og er slíkt algengara fyrir uppsjávarafurðir en aðrar sjávarafurðir. Stærsti hluti leiðréttingarinnar er vegna útflutnings á makríl en einnig vegna síldar, loðnu, ufsa og karfa. Samkvæmt upplýsingum frá Hagstofunni mun hún leiðrétta mánaðartölurnar við næstu birtingu sem er í lok þessa mánaðar,“ segir á Radarnum.

• Blogga um frétt