Viðskiptavinir Olís söfnuðu rúmum sex milljónum króna fyrir Slysavarnarfélagið Landsbjörg árið 2021.  Upphæðin safnaðist á sérstökum dæludögum Olís sem haldnir voru á árinu. Þá runnu 5 krónur af hverjum dældum eldsneytislítra til Landsbjargar auk þess sem viðskiptavinir Olís og ÓB fengu 20 krónur í afslátt af lítranum.

„Það er ánægjulegt að sjá hversu vel viðskiptavinir okkar tóku í þetta átak og okkur er sönn ánægja að styrkja Slysavarnarfélagið Landsbjörg. Landsbjörg stendur fyrir mikilvægu starfi sem unnið er af sjálfboðaliðum um land allt.  Það er því ánægjulegt að geta gert viðskiptavinum Olís kleift að leggja sitt af mörkum til að styðja við bakið á Landsbjörg,“ segir Jón Árni Ólafsson, sviðsstjóri smásölusviðs Olís.

„Samstarfið við Olís undanfarin ár hefur verið afar farsælt og stuðningur viðskiptavina Olís er kærkominn þar sem starf Landsbjargar er fyrst og fremst unnið af sjálfboðaliðum. Við viljum þakka landsmönnum fyrir stuðninginn,“ segir Kristján Þór Harðarson, framkvæmdastjóri Slysavarnarfélagsins Landsbjargar.