„Elsku hjartans stelpan hlýja Solla mætti manni alltaf skælbrosandi „hæ frænka” og faðmaði mann fast. Hún var alltaf hlægjandi, sagði það sem henni fannst, nokkuð hátt og mamma talaði alltaf um Sollu sem einu duglegustu frænku mína. Eyþór frændi lýsir henni vel með orðunum „síbrosandi og hjálplegur engill sem hvergi mátti aumt sjá,” segir Þórdís Kolbrún Reykfjörð Gylfasóttir, ráðherra ferðamála-, iðnaðar- og nýsköpunar, í stuttri og fallegri Facebook-færslu.
Þórdís er frænka Sólveigar Katrínar Hallgrímsdóttur sem lést af áverkum sínum um helgina eftir að hafa fallið í skriðu í Flekkudal í Hvalfirði á þriðjudagskvöld.
Móðurbróðir Sólveigar, Eyþór Eðvarðsson, greindi DV frá því í gær að fjölskyldan hefði samþykkt líffæragjöf Sólveigar og kom sérfræðingateymi frá Svíþjóð hingað til lands vegna líffæraflutninganna í gærkvöld.
Er það fjölskyldunni huggun í djúpri sorg að hreysti Sólveigar, sem var útivistarkona mikil, skuli færa öðrum manneskjum betra líf.