Alexis Sánchez skoraði bæði mörk Inter Mílanó þegar liðið vann 2:1 útisigur gegn Parma í ítölsku A-deildinni í gærkvöldi. Með sigrinum jók Inter forskot sitt í sex stig á toppi deildarinnar.
Sánchez hefur að mestu mátt þola bekkjarsetu á tímabilinu þar sem Romelu Lukaku og Lautaro Martínez hafa eignað sér framherjastöðurnar tvær, enda búnir að vera afar drjúgir í markaskorun.
Eftir að grannarnir og erkifjendurnir í AC Milan misstigu sig um helgina með því að gera 1:1 jafntefli gegn Udinese gat Inter aukið forskot sitt í sex stig.
Eftir markalausan fyrri hálfleik minnti Sánchez á sig í þeim síðari þegar hann skoraði á 54. og 62. mínútu og kom Inter þar með í 2:0 forystu. Parma minnkaði svo muninn með marki frá Hernani á 71. mínútu en þar við sat.