Í gær bárust fregnir af því að leikmaður úr ensku úrvalsdeildinni hafi verið handtekinn og yfirheyrður vegna meints brots gegn barni undir lögaldri.
Seinna um kvöldið staðfesti Everton að leikmaðurinn væri úr þeirra röðum en áður hafði komið fram að leikmaðurinn væri 31 árs og hefði spilað fjölda landsleikja fyrir þjóð sína.
Í dag greindi mbl.is frá því að sá leikmaður væri Gylfi Þór Sigurðsson. Mikill stormur var á samfélagsmiðlinum Twitter um helgina þar sem netverjar veltu fyrir sér þessum orðrómi, löngu áður en greint var frá málinu í fjölmiðlum. Lítt þekktir slúðurmiðlar fjölluðu um málið og nafngreindu Gylfa strax á sunnudaginn.
Virtist það ýta undir sögusagnirnar að Alexandra Helga Ívarsdóttir, eiginkona Gylfa, lokaði Instagram-síðu sinni um sama leyti. Þau eignuðust saman barn á dögunum og missti Gylfi af landsleikjaverkefnum þar sem hann vildi ekki missa af fæðingu barnsins.