Þórólfur Guðnason, sóttvarnalæknir, telur ekki ástæðu til að herða sóttvarnaaðgerðir vegna Ómíkron-afbrigðis kórónuveirunnar. Enn sé mikið óljóst um eðli afbrigðisins en Þórólfur væntir þess að línur muni skýrast betur eftir um viku þegar niðurstöður fara að koma úr rannsóknum á mótefnum hvað ómirkón varðar. Þetta kom fram í Bítinu á Bylgjunni.

Þórólfur segir að þó svo að fregnir hafi borist þess efnis að Ómikrón valdi ekki alvarlegum einkennum þá sé enn of snemmt að fullyrða nokkuð um það. Margir sem hafi greinst með afbrigðið séu aðeins búnir að vera smitaðir skamma stund en oft tekur það um viku fyrir alvarleg einkenni að koma fram.

Enn sé einnig óljóst hvaða áhrif fyrri smit og bóluefni hafi á afbrigðið.

PCR-próf geti þó greint afbrigðið en virkni hraðprófa sé ekki eins góð og því hvetur Þórólfur þá sem finna til einkenna og eru veikir að drífa sig beint í PCR-próf því ekki sé hægt að fyllilega treysta niðurstöðum hraðprófa enda séu þau aðeins ætluð til að skima einkennalaust fólk sem er á leið á einhverja viðburði.

Þórólfur er þó ánægður með örvunarsprautuna og segir hana veita um 90 prósent betri virkni en sprauta númer tvö, en þó sé enn óljóst hvað verndin vari lengi.

Aðspurður um hvort hann sæi tilefni til að herða aðgerðir svaraði Þórólfur:

„Nei ekki finnst mér það. Mér finnst að það sé ekki ástæða til þess og þess vegna erum við bara svona að hinkra og bíða og fylgjast með þessu.“

En eins og margir vita hefur Þórólfur nú skilað minnisblaði til heilbrigðisráðherra. Þórólfur hefur ekkert gefið upp um efni minnisblaðsins en sagði þó í samtali við fjölmiðla fyrir helgi að ólíklegt væri að hann sæi tilslakanir í kortunum.

Að lokum sagði Þórólfur að hann væri ánægður með mætingu landsmanna í örvunarsprautuna og hvetur þá sem eiga slíkt eftir til að mæta.