Orka náttúrunnar hefur lagt fram kæru til lögreglu á hendur starfsmanni sem sá um þrif í Nesjavallavirkjun vegna uppsetningar starfsmannsins á myndavél á salernisaðstöðu í virkjuninni.
Starfsmaðurinn sem um ræðir starfaði hjá AÞ-Þrifum ehf og hefur honum verið sagt upp störfum.
Í yfirlýsingu frá Orku náttúrunnar til DV vegna málsins segir:
„Orka náttúrunnar lítur málið mjög alvarlegum augum enda er um að ræða möguleg brot á okkar starfsfólki á okkar starfsstöð. Í kjölfar þess að tilvist myndavélarinnar uppgötvaðist virkjaði starfsfólk og stjórnendur viðbragðsáætlun og starfsfólk Nesjavallavirkjunar var upplýst. Eftir að ljóst var að starfsmaður verktakafyrirtækis sem sér um ræstingar í virkjuninni gaf sig fram var sá hinn sami kærður til lögreglu. Orka náttúrunnar vonast til þess að rannsókn lögreglu dragi allar staðreyndir málsins fram.“
Samkvæmt heimildum DV uppgötvaði kvenkyns starfsmaður Nesjavallavirkjunar myndavélina en áttaði sig ekki í fyrstu um hvers kyns tæki var að ræða. Starfsmaður verktakafyrirtækisins AÞ-Þrif gaf sig fram í framhaldinu og játaði að hafa sett myndavélina upp. Ekki liggur fyrir hvort myndavélinni var ætlað að taka upp, streyma beint eða hvort einhverju myndefni var miðlað yfir höfuð.
DV hafði samband við forsvarsmenn AÞ-Þrifa vegna málsins sem brugðust við með eftirfarandi yfirlýsingu:
„Því miður var starfsmaður uppvís að alvarlegu broti, starfsmanninum var umsvifalaust sagt upp störfum enda brotið alvarlegt. Í 15 ára sögu fyrirtækisins hefur atvik sem þetta ekki komið upp áður. Hlutaðeigendum var boðin fagleg aðstoð. AÞ-Þrif harmar að mál sem þetta komi upp og vinnur að þvi að leysa málið í viðeigandi ferlum með lögreglu og fagaðilum.“