Bjarni Ólafsson AK kom til Neskaupstaðar með fyrsta loðnufarm vertíðarinnar fyrir hádegi í dag, samkvæmt færslu sem birt hefur verið á vef Síldarvinnslunnar, sem gerir skipið úr. Þar segir að aflinn hafi verið um 1.600 tonn og fékkst hann í átta holum um 45 mílur norður af Melrakkasléttu.

„Nánast öll veiðin á sér stað yfir daginn. Menn draga yfir nóttina en það kemur afar lítið út úr því. Stærsta holið okkar var rúmlega 400 tonn. Loðnan er fín, en stærð hennar er svolítið misjöfn eftir holum – frá 36 og upp í 48 stykki í kílóinu,“ segir Þorkell Pétursson, skipstjóri á Bjarna Ólafssyni, í færslunni.

Um er að ræða fyrsta loðnutúr Þorkels í hlutverki skipstjóra.

„Menn eru fullir bjartsýni hvað varðar vertíðina og vonandi fer loðnan brátt í hefðbundið göngumynstur. Það brældi í gær og þess vegna var ákveðið að fara í land þó við værum ekki alveg búnir að fylla. Það verður losað og síðan haldið beint út aftur. Menn geta ekki leyft sér að slappa af á vertíð eins og þessari. Það eru sko næg verkefni fram undan,“ segir Þorkell.

Loðnuflotinn er allur búinn að kasta enda hafi brælan gengið niður og skilyrði til veiða því mun betri. Skip Síldarvinnslunnar, Börkur NK, Barði NK og Beitir NK, eru öll þegar komin með afla.

Tengdar fréttir

Loðnuveiðar

Kaupa norska loðnu á uppboði

• Árangurslausri loðnuleit formlega lokið
• Ekkert markvert fundist af loðnu
• Heimaey bættist í hóp leitarskipa
• Tvö skip leita nú loðnu suðaustur af landinu

» Fleiri tengdar fréttir

• Blogga um frétt