Í nýrri auglýsingu fyrir Bestu deildirnar í knattspyrnu karla og kvenna er gert grín að auglýsingu síðasta árs, þar sem hallaði töluvert á leikmenn og þjálfara kvennaliðanna.
Auglýsing síðasta árs sætti töluverðri gagnrýni vegna þess og þar á meðal bentu Hagsmunasamtök knattspyrnukvenna á að einungis 12 prósent leikmanna eða þjálfara í henni hafi tengst Bestu deild kvenna.
Í auglýsingunni í ár kynnir Guðmundur Benediktsson knattspyrnulýsandi nýliða deildanna snemma í auglýsingunni. Þar gera nýliðar ÍA karlamegin sig klára en þá grípur Nadía Atladóttir, fyrirliði nýliða Víkings úr Reykjavík, inn í og segir við Skagamenn:
„Hey, rólegur tjokkó. Hann er að tala um okkur. Þetta verður ekki sama hrútafýluauglýsingin og í fyrra.“
Auglýsinguna fyrir Bestu deildirnar í ár má sjá með því að smella á hlekkinn fyrir neðan: