Allt komið í hnút vegna hæðarkóta

Hilmar Páll Jóhannesson og Inga Lóa Guðjónsdóttir hjá Loftkastalanum ehf. hafa tekist á við Reykjavíkurborg í hátt á þriðja ár vegna skipulags á lóð fyrirtækisins í Gufunesi, að því er fram kemur í Morgunblaðinu í dag.

Frétt af mbl.is

Borgin í slag við Loftkastala

Loftkastalinn keypti þar tvö hús, sem eru þrjú fasteignanúmer, og 1.800 fermetra lóð af borginni ásamt byggingarrétti í janúar 2018. Eignirnar tilheyrðu áður Áburðarverksmiðjunni. Þar ætlar Loftkastalinn ehf. m.a. að smíða leikmyndir og endurvinna frauðplast. Byggja á við húsin svo þau rúmi starfsemina.

Ein af forsendum kaupanna var að gólf væntanlegrar viðbyggingar og lóðin væru sem mest á jafnsléttu og gólfin í svipaðri hæð og er í gömlu húsunum. Það er til að auðvelt sé að renna t.d. stórum leikmyndum á milli húsa.

Eftir að kaupin voru frágengin var ákveðið að skipta lóðinni í tvennt og eigendum sagt að það hefði engin áhrif á neitt hjá þeim. Síðar kom í ljós að hækka átti baklóðina um 60 sentimetra. Þau í Loftkastalanum geta ekki sætt sig við þessa hækkun og segja að hún hafi aldrei verið nefnd í kynningum sem þau fengu.

Hilmar telur að mistök hafi verið gerð hjá verkfræðistofu sem var fengin til að taka hæðarpunkta. Hann bendir á hurðargat á bakhlið hússins og að mælingarmaður hafi miðað við þröskuld þess sem er í eðlilegri hæð að utan yfir jörð. Þegar dyrnar eru opnaðar kemur í ljós að gólfið er 35 sentimetrum lægra en þröskuldurinn. Þess vegna séu allir hæðarpunktarnir rangir. Þetta hefur ekki fengist leiðrétt og setur málið í hnút, að mati Hilmars.

Frétt af mbl.is

„Þetta er valdníðsla á hæsta stigi“

Fyrirspurn um málið

Loftkastalinn sendi öllum borgarfulltrúum yfirlýsingu Orra Steinarssonar, arkitekts hjá arkitektastofunni JVANTSPIJKER & PARTNERS, frá 25. ágúst 2021. Orri vann að deiliskipulagi á svæði Gufuness fyrir Reykjavíkurborg 2016-2019. Arkitektastofan fékk það hlutverk að gera deiliskipulag fyrir fyrsta áfanga kvikmyndaþorps.

Fulltrúar Sjálfstæðisflokksins í skipulags- og samgönguráði tóku málið upp og lögðu fram fyrirspurn á fundi ráðsins 1. september vegna yfirlýsingarinnar. Þeir bentu á að samkvæmt henni væri staðfest að hæðarkótar sem voru gefnir út í Gufunesi hefðu verið rangir.

„Eitthvað hefur farið úrskeiðis því fyrirhugaðir hæðarkótar í landinu umhverfis lóð Loftkastalans eru ekki í samræmi við þessar rekstrarforsendur, né eru þeir í samræmi við þá samráðsfundi eða kynningar sem haldnar voru með Loftkastalanum. Hlutaðeigandi aðilar hafa kvartað yfir þessu lengi vel og því mikilvægt að brugðist sé við þessum mistökum sem allra fyrst,“ sagði í fyrirspurninni. Einnig var spurt hvernig þessi mistök yrðu leiðrétt gagnvart hlutaðeigandi. Málinu var frestað.

„Við höfum ekki fengið nein viðbrögð. Af gögnum málsins að dæma er ekki annað að sjá en að borgin hafi gert mistök. Þá finnst manni eðlilegt að borgin bregðist við því en sé ekki í málaferlum við viðkomandi,“ sagði Eyþór L. Arnalds, oddviti Sjálfstæðisflokksins í borgarstjórn og fulltrúi í skipulags- og samgönguráði.

Hann sagði það vera grundvallaratriði að lóð sem fólk keypti væri í samræmi við forsendur kaupanna. „Við viljum að borgin veiti góða þjónustu og skili því sem skila á,“ sagði Eyþór. Hann sagði margt virðast vera undarlegt í þessu máli og ekki hans að rekja það allt, því málið væri komið fyrir dómstóla.

„Borgin á að veita fólki þjónustu og reyna að leysa mál en í staðinn lendir hún oft í málaferlum. Það eru mörg dæmi um slíkt undanfarið, bæði í innkaupum og alls konar málum sem ég hef séð. Þá virðist vera valin sú leið að fara fyrir dómstóla, sem tekur stundum mörg ár og er erfitt fyrir mótaðilann. Ég tel heppilegra að reyna að leysa málin fremur en að reka þau fyrir dómstólum.“

Málið fór fyrir úrskurðarnefnd

„Þetta er mjög tæknilegt mál samkvæmt þeim skýringum sem ég hef fengið,“ sagði Pawel Bartoszek, borgarfulltrúi Viðreisnar og formaður skipulags- og samgönguráðs. Hann sagði lóðarhafa hafa haft ákveðnar væntingar til hönnunar aðliggjandi götu. Þær væntingar ættu sér ekki bindandi stoð í deiliskipulagi að mati borgarinnar og hefðu ekki reynst framkvæmanlegar vegna áveðinna hönnunarforsendna. Meðal annars þyrfti ákveðinn vatnshalli að vera á götunni svo vatnið rynni af henni. Borgin hefði lagfært hæðarkóta götunnar en ekki hefði verið hægt að koma til móts við óskir lóðarhafans að fullu.

„Borgin lét reyna á þetta fyrir úrskurðarnefnd umhverfis- og auðlindamála í fyrra. Þá fór lóðarhafi fram á að framkvæmdir yrðu stöðvaðar en borgin hafði betur í því máli. Það var því ekki niðurstaða úrskurðarnefndarinnar að borgin hefði haft rangt við í málinu,“ sagði Pawel.

Hann kvaðst sem formaður skipulags- og samgönguráðs telja að sitt hlutverk væri að gæta þess að borgaryfirvöld færu að lögum og gættu að réttindum borgaranna. Pawel kvaðst ekki sjá að borgin hefði haft rangt við í þessu máli því fyrir lægi úrskurður um annað.

Hann kvaðst reikna með að fyrirspurninni yrði vísað til skrifstofu framkvæmda og viðhalds sem myndi taka saman svör fyrir kjörna fulltrúa. Pawel sagði borgaryfirvöld ekki líta svo á að þörf væri á frekari aðgerðum í þessu máli af þeirra hálfu.