Björgunarsveitir á Suðurlandi komu þremur ferðalöngum við Mælifellssand, rétt norður af Mýrdalsjökli, til bjargar um klukkan níu í kvöld.
Fólkið hafði fest bíl sinn á svæðinu og óskaði eftir aðstoð neyðarlínu um kvöldmatarleytið.
Þetta kemur fram í tilkynningu frá Landsbjörgu.
Fólkið var á Vesturleið um hálendið þegar bíll þeirra festist í snjó. Lélegt símasamband er á svæðinu og því varð fólkið að ganga nokkurn spöl til að komast í betra samband.
Þegar samband loks náðist gat fólkið gefið upp staðsetningu sína, enda voru viðbragðsaðilar ekki vissir í fyrstu hvar leita ætti að fólkinu þar sem ekki var vitað hvort þau væru við bílinn eða ekki.
Björgunarsveitir voru sendar úr tveimur áttum á Mælifellssand þar sem talinn var möguleiki á að leita þyrfti að fólkinu.
Ferðalangarnir fundust um klukkan níu um borð í bílnum og er nú unnið að því að losa bílinn ásamt því að ferja fólkið til byggða í austurátt.