HK leikur í úrvalsdeild kvenna í handknattleik á komandi keppnistímabili eftir fjögurra marka sigur gegn ÍR í þriðja leik liðanna í úrslitum umspils um sæti í efstu deild í Kórnum í Kópavogi í kvöld.
Leiknum lauk með 26:22-sigri HK sem vann einvígið samanlagt 3:0.
ÍR-ingar byrjuðu leikinn betur en eftir um tuttugu mínútna leik komst HK yfir og lét forystuna aldrei af hendi eftir það.
Sara Katrín Gunnarsdóttir átti stórleik fyrir HK og skoraði 9 mörk og þær Elna Ólöf Guðjónsdóttir og Margrét Guðmundsdóttir fimm mörk hvor.
Karen Tinna Demien var markahæst í liði ÍR með 5 mörk og Hildur María Leifsdóttir og Laufey Lára Höskuldsdóttir skoruðu fjögur mörk hvor.