Farinn frá Vestmannaeyjum

Spænski knattspyrnumaðurinn Gonzalo Zamorano hefur yfirgefið ÍBV. Þetta staðfesti hann í samtali við fótbolta.net í dag.

Zamorano skoraði þrjú mörk í tíu leikjum í 1. deildinni í sumar, Lengjudeildinni, og hjálpaði Eyjamönnum að tryggja sér sæti í úrvalsdeildinni á komandi keppnistímabili en hann missti af hluta tímabilsins vegna meiðsla.

Zamorano á að baki 20 leiki í efstu deild hér á landi en hann hefur leikið með Hugin, Víkingi frá Ólafsvík og ÍA hér á landi.

„Planið mitt er að spila áfram á Íslandi næstu árin, ég er 26 ára og tel að ég eigi mín bestu ár framundan,“ sagði Zamorano í samtali við fótbolta.net.

„Ég ætla að eyða tíma með fjölskyldu minni og æfa heima, svo mun ég taka rétta ákvörðun fyrir næstu ár,“ bætti leikmaðurinn við.

• Blogga um frétt