Bardagakappinn Conor McGregor gæti verið á leið aftur í búrið en hann lýsti því yfir opinberlega að hann sé reiðubúinn að mæta Dustin Poirier í Texas hinn 23. janúar.
McGregor barðist síðast í janúar þegar hann hafði betur gegn Donald Cerrone en í júní tilkynnti McGregor hins vegar að hann væri hættur í UFC.
Slíkar yfirlýsingar hafa hins vegar ekki haft mikla þýðingu því var það í þriðja sinn á fjórum árum sem McGregor sagðist vera hættur.
Samkvæmt BBC er McGregor í viðræðum við UFC um að snúa aftur og fá að mæta Dustin Poirier. McGregor sagðist á samfélagsmiðlum sjá fyrir sér að bardaginn myndi fara fram á leikvanginum glæsilega AT&T stadium, heimavelli Dallas Cowboys í NFL-deildinni.
McGregor sagðist á dögunum vilja mæta Manny Pacquiao í hnefaleikum en ef af þessum viðburðum yrði þá er það væntanlega nokkru síðar.